القصة دي حكتها لي فلانة ،… فلانة دي واحدة صحبتي ، بعرفها زي روحي وامكن اكتر ،… العينة الما بتقدر تسكت بي كلام ، او تدس احساس زي ما بيقول المثل ” الفي قلبها علي لسانها
فلانة قالت تغير جو وتشم ليها حبة هوا ،… مشت تشرب قهوة في شارع النيل ،… معاها أحد الاصدقاء ( فلان داك) مشوا ، واتمشوا ،… اخر شي قالو خلاص نقعد مع اي ست شاي ،..
قعدوا،.. الجو كان جميل جداً زي ايام ديسبمر ، لاحر لابرد ،.. والمرة جابت بخور ،… وكان لطيفة شديد ،… افتكرت ( فلانة) وفلان داك) بيحبو بعض ،.. وونسة وضحك ، وونسة ،.. كان في ناس كتاااااار قاعدين ،… زي (فلانة ) وفلان داك) والوقت لسة بدري ، العشا ما جا،… جات عربية وقفت جنبهم ،… فيها اتنين بيتونسوا ،.. وهم راكبين ومفتحين البيبان ،.. وطلبوا قهوة برضو ،… ولا شنو ما عارفة ، ما ركزت معاهم شديد ،…
ما حتتخيلو حصل شنو ؟؟؟
جات عربية الدورية ،… ماشة تتدب ،… والعساكر بيبحلقو في الناس وش وش ،… ليه ؟ الله اعلم ،.. مشو زي متر كدة مننا ،… وجو راجعين ،… الله يسترنا مهنم عيونهم شر شر ، أعوذ بالله،… نادو الناس القاعدين في العربية ،… وهاك يا كواريك وسب وتهزيئ ،… ليه ؟ مافي زول عارف ،… ناس قاعدين في الشارع نص الناس ،… فلانة ما قدرت تستوعب ،… أرح يا فلان داك نمشي من هنا أعصابي ما بتتحمل جنس دة ، العجب كان سألوني أهلي بتجيهم صدمة”” بعد شوية واحد من العساكر نزل ساكي البت ،… كانت دايرة تتصل بالتلفون ،… وهو ساكيها داير يقلعو منها ،… سبحااااااااان الله ! ” سريع يا فلان داك ، دي حاجة ما انسانية ، ولو سكتنا عليها ما بننوم ، ولو اتكلمنا ………
” اها يا مدام ، شكرا علي القهوة والبخور ، والاستضافة الكريمة ، الحساب كم؟
” الكباية بي جنيهين “
” ليه؟ هسة قريب مش كانت بي جنيه ؟ “
“والله يا اخواني انتو ما أرفين الهاسل ، امبارح جوا العساكر شالو الكراسي دي كلها ودوها البلدية مشيت ارجعهم الليلة قالو لي ادفعي غرامة 5 جنيه لكل كرسي “
” انتي اسمك منو ياختي ومن وين؟ ” “اسمي رانيا ، من دارفور”
” خلاص بنجيك تاني قهوتك ظريفة وقدر ما أقول اجيك تاني ، أخاف من….
الحكاوي كترت ، كترت شديد ،… والسكات بقي صعب ،… الواحد بقي ما عارف اخير قلبو يكون ميت ،… ولا يكون حي وكل يوم ينتح فيك الله ليك يا رانيا ، الله في الحكاوي كترت ، كترت شديد ،… والسكات بقي صعب ،… الواحد بقي ما عارف اخير قلبو يكون ميت ،… ولا يكون حي وكل يوم ينتح فيك
Sudanese Dream 